冬去春來，冰雪解封大地。我踩著單車穿過奧斯陸雕塑公園上班去。沿途景色如畫，陽光普照，鳥語花香，心情大好。
突然，有一位挪人向我大呼：「Ni Hao!（普通話的你好）」嘩，＿！一向溫文爾雅的我都不禁爆起粗來。我裝作聽不到，然後加速離開。我明白那挪人好客有禮，在遊客區遇見亞裔女子，想令遊客賓至如歸，無奈「Ni Hao」對我來說真心難聽過粗口。「Ni Hao」勾起我家鄉被蹂躪的國愁家恨，令我原本大好的心情變得沉重。我來自香港，我小時候的香港只叫香港，不是什麼中國。我的母語是廣東話，我們不會說「Ni Hao」。情況就像我一向都係陳太個女，陳太長住外國，遙距地庇蔭著我，所以我從小就很獨立自主。到我長大成人，突然有日黃師奶同我講佢先至係我媽。黃師奶很專制，迫我認佢做阿媽，又屈我佢講嘅鄉下話先至係我母語。陳太離我而去，我變了孤兒仔，獨自面對橫蠻的黃師奶。於是有日我頂唔順，離家出走，想去搵個新的家，遠離是非，重新出發。豈料，外人都說我是黃師奶個女！冇錯，黃師奶霸咗我屋企已成定局，弱勢的我都被迫放棄自己屋企了，但可唔可以畀返小小尊嚴我，唔好叫我做黃師奶個女呢？先戴頭盔，我想帶出的不是港獨、不是革命。政治問題我無能為力，身為一個小市民，我只想身邊的人對我香港人的背景有基本的尊重。北歐人對香港普遍認識不多，有很多人對一國兩制聞所未聞。不過大部份人的思想都很開放，只要你肯解說，他們都樂意聽。曾幾何時，我厭惡去介紹自己的國籍，為何每個人都要有屬於自己的的國籍呢？我的心只有「Hong Kong」一個「國籍」，無奈很多時在官方場合都不能寫。「China」一字對我就如刀一樣，每一次聽到，我的心就被刀割一割。與其逃避，倒不如進取，我就要在有人說「China」一字之前搶先說「Hong Kong」！我要向身邊所有人介紹香港，介紹廣東話。其實西方國家大部分人都理解黃師奶的霸道，他們聽過後都會深表同情和理解。我們身為小市民可能改變不了香港現在的慘況，但至少我們可以改變其他人對我們的看法，嘗試得到國際社會的體諒和認同。